هذه الثلاثيات كتبت على عجل ردا على قصيدة " المصرى الطيب " للشاعر أبو حميد المصرى وتحية إليه وإلى كل مخلص للقضية الوطنية .. مع أطيب التمنيات
حيى بلادك
------------------
أضم صوتى لصوتك .. وحياة جدى وجدودك
سكنوا هنا قبلنا
عاشوا يحبوا الأرض .. زرعوا فى نفس الأرض
وشقوا نفس القنا
يجعل صباحنا ندى .. وجحيم على المعتدى
فتنة وبقت همنا
أكيد فيه بيننا ناس .. لا عقل ولا إحساس
بتهد فى اللى اتبنى
الإسم بنى آدمين .. والحق متباعين
وهبل على شيطنة
الدعوة دعوة مرة .. فشلت ومليون مرة
تفرق ما بين شعبنا
فيه ناس بتستغبى .. ناس عايزة تتربى
تكره تشوفنا ف هنا
فيه ناس وبدون مبالغة .. يستاهلوا ضرب البلغة
لا مؤاخذة يا عمنا
والهبل فى الزفة .. مسكوا لهم الدفة
صوتهم على عننا
ياخسارة يا مدينة .. ويا خسارة يا مينا
طب ليه وحدتنا؟
ويا خسارة يا عمرو .. ياللى رضيت بالأمر
ورضينا كلنا
م النيل شربنا سوا .. والكل منه ارتوى
وزرعنا أرضنا
يجرى آلاف أميال .. يروى آلاف أجيال
قسمتنا ورزقنا
عمره ما فرق ناس .. عن ناس ولا ساب ناس
أمره كده ربنا
الشعب مش شعبين .. ولا أبدا عنصرين
دى كلمة مش هينة
انظر إلى الخلقة .. واتمعن الهيئة
ملامحنا اهى بينة
ح تشوف نفس العيون .. لو وسط كام مليون
ح نميز بعضنا
لو نتقابل فى غربة .. أو عضت فينا كربة
ح نحن لبعضنا
يا ربنا ف سماه .. يا جل جل علاه
اكفينا شرنا
وتوب على اللى تاه .. واكتب لينا النجاه
وخلينا لبعضنا
يا مصرى فوق فوق .. وارفع راسك لفوق
لا يصيبنا عدونا
امسك فى ايدين اخوك .. ارفع رايات أبوك
وجدود جدود جدنا
ولا فيش ممالك دايمة .. بكرة القيامة قايمة
ويحاسبك ربنا
وصى ولادك وصية .. حيى بلادك تحية
دى بلادنا كلنا
--------------------------
د. أسامة عفيفى
مايو 2007
موضوع: حيى بلادك 
السبت مايو 26, 2007 2:14 pm
