المصري الطيب

مصري أنا و طيب
قانع و قلبي كبير
ما فيا حاجة تِعَيٍِب
عليا حِكوا أساطير
لو بعدت يوم عن هنا
و لو مليون سنه
لازم ح ييجي اليوم
اللي أرجع هنا

لا ييجي يوم أمَيل
و أبيع أخويا للغير
لا أسمع لمن هَول
ماسك في إيده نفير
لو كان بيحبنا
ما كان يقول عننا
ما يسبب التكدير
يبعدنا عن بعضنا

أيام كتير عدت
و أنا شديد لا ألين
بأحزان ما إتعدت
قاسم الرغيف لتنين
نشيل سوا همنا
لا شدة بتهزنا
دا إحنا لحن أصيل
نكمل فيه بعضنا

فاكر زمن جدودنا
حموا الديار و الغيط
لا فرطوا في حدودنا
ما إتقطع بيناتنا الخيط
ييجي يوم جهلنا
نسمع لمن سبنا
بكلام سفيه و حقير
من كتر كرهه لنا

زمان الناس حكيت
و إتغنوا في الترانيم
لو الشدة يوم إشتدت
يكون فرجها عظيم
إزاي نسيب بعضنا
لعدو كايد لنا
دا برضه مهما يكون
دا دمنا و عرضنا

ما تياللا يا أخوة
يا أقباط يا مسلمين
ياللا تاخدنا نخوة
لنظل مخلصين
لوطن بيضمنا
أرضه من تحتنا
رفات جدود كتير
عاشوا و ماتوا هنا

ما تياللا يا مينا
و إنت كمان يا حسين
نحضن في بعضينا
ما يكون ما بينا بين
دا من حنان ربنا
جمع ما بينا هنا
لنعبد رب الكون
الخالق لنا كلنا
______

أبو حميد المصري