الرمش المسنون

بسم الله الرحمن الرحيم


ناس حارتنا كلهم
على قد حالهم
م الفجر يخرجوا
و الرب وكيلهم
رزقهم على قدهم
المولى عاطي لهم
الستر طالبينه
و الصحة راس مالهم

أمين يرجع ع المسا
و في إيديه شايل
اللي ربه رزقه بيه
قليل كتير قابل
يدخل ع العيال و أمهم
تتغندر و تتمايل
فرحانه براجلها اللي
م الصبا عليها قايل

يبادر أهله
بالسلام و السؤال
يطمئن على الحال
و يبوس العيال
قدامهم يبان
ميسور الحال
شلن لزينب
وبريزة لعبد العال

مراته تسمعه كلام
جميل يرد الروح
تسلم إيدين اللي
اشترى لنا الخوخ
يحرسك يا سبعي
منين ما تروح
ربي يجعل في وشك
كل باب مفتوح

لولا الملامة و كمان
العيال صاحيين
لكانت حضنته
و باسته م الخدين
لكن بعد العشا
و العيال نايمين
يحلى الكلام
و مناغشة العاشقين

أنا كمان طبخت لك بامية
بالهنا و الشفا لأبو ممدوح
غير هدمتك جلابيتك مكوية
ع السرير و سيب الباب مفتوح
و ضحكتها ظاهرة مخفية
و عينها بالسر تبوح
ممدوح مين دا يا وليه ؟
هو إنتي روحتي لأم فتوح ؟

ردت و عامله مكسوفة
قالت لي ولد إن شا الله
بص لها بصه معروفة
و فكره مشغول بالمره
الدنيا غلا و القدرة محدودة
و العيشة صعبة و بقت مره
قال بعد العشا لنا حدوته
نشوف لنا حل و نكسر القله

قعدوا و أكلهم بإيديهم
لا شوكة و لا سكين
كل دي من إيدي تعدمني
تسلمي يا نور العين
كل يا ولا من قدامك
إنت لك بطنين ؟
كلي يا زينب و أمضغي
يا عيال ما تباتوش جعانين

العيال نامت بعد أكل الفول
قال قومي طفي التليفزيون
عندي كلام يلزمني أقول
رمشت و رمشها مسنون
بعين فيها طلب و قبول
بالسكوت صار محموم
الغرام شرحة يطول
لأنه في حبها مسجون
ليكمل القول
في أوضة النوم
___________


أبو حميد المصري