الحلوة و المرة في لقمة!

قالت و دمعتها
على خدها تدحرج

لو عشرتنا إستحالت
قول ...
و أنا من حياتك أخرج

كل يوم تقول ...
دي قالت
وعادت...
بكلام كتير يحرج

زمان كنت صبية
اليوم الراس شابت
دا ربنا جعل لنا
من الجواز مخرج

نزل كلامها
سهم إتغرس في القلب
بعد العمر دا ممكن
يكون دا الحل؟

سكت و الفكر
في راسه دب
الحال يكون إيه
لو حصل ؟

ياما عاتبها
و ما لها ذنب
سنين صابرة
هنا يبان الأصل

قرب منها و بكفه
مسح دمع العين
برضك كدا ..
يا أم العيال يا غاليه

طيب أنا زهقان ...
تعبان حبتين
إستحملتيني لما
قاسية كانت الدنيا

عزنا دا إنتي
فاكراه منين ؟
شعر إن العمر
معاها كان ثانية

ما هما روح واحده
في جسدين
إتقاسموا الحلوة
و المرة في لقمة

برحمة ربك
عارف حكمتها
العمر قضوه
سوا عايشين

إفتكروا أيام
الفرحة ملئتها
قبلها ...
على الخد و الجبين

مسكت إيده باستها
و إحمروا الخدين
بكسفة قالت ...
الله بقى يا سي حسين ؟؟
__________________

أبو حميد المصري